छत्तीसगढ़ म गुरूजी मन अऊ पढ़ईया लईका मन के संख्या के अनुपात राष्ट्रीय अनुपात ले आगर

रायपुर, 22 जुलाई 2024/ मुख्यमंत्री श्री विष्णु देव साय ह आज विधानसभा म प्रश्नकाल म स्कूल शिक्षा के संबंध म जानकारी देवत बताइन के छत्तीसगढ़ म गुरूजी मन अऊ पढ़ईया लईका मन के अनुपात राष्ट्रीय अनुपात ले आगर हे। उमन बताइन के देश म 26 पढ़ईया लईका मन के पीछू एक शिक्षक (गुरूजी) हे जबकि प्रदेश म 21 पढ़ईया लईका मन के पीछू एक शिक्षक हे। गुरूजी मन के पदस्थापना म अब तक कुछ अव्यवस्था रहिस। जेखर सेती गुरूजी मन के कमी के अभास होवत रहिस। ते पाए के सबले पहिली युक्तियुक्तकरण करना पहली प्राथमिकता होही। कुछ स्कूल मन म जहां विसय संकाय हे उहां शिक्षक नइ हे जिहां विसय संकाय नइ हे उहां शिक्षक हें। कुछ स्थान मन म राज्य के अनुपात ले घलोक बहुत कम पढ़ईया लईका मन म शिक्षक हे। कुछ स्थान मन म तो 4-5 विद्यार्थी म एक शिक्षक हे। युक्तियुक्तकरण के प्रक्रिया बर अइसन स्कूल मन के चिन्हांकन करे जात हे अऊ लउहेच सबो स्कूल मन म गुरूजी मन के पदस्थापना कर दे जाही। एखर से सबो स्कूल मन म शिक्षक उपलब्‍ध हो जाही अऊ शिक्षा के स्तर अऊ अच्छा हो जाही।
मुख्यमंत्री ह ये घलोक कहिन के गुरूजी मन के व्यवस्था के संग ही अधोसंरचना विकास म घलोक हम काम करत हन।
जानबा हे के छत्तीसगढ़ म शिक्षक अऊ पढ़ईया लईका मन के अनुपात राष्ट्रीय औसत ले घलोक आगर हे। युक्तियुक्तकरण के प्रक्रिया पूरा होए ले सबो स्कूल मन म शिक्षक मिल सकही। साय सरकार कोति ले करे जात युक्तियुक्तकरण के सकारात्मक असर प्रदेश के शिक्षा व्यवस्था म पड़ही अऊ अइसन स्कूल मन म घलोक शिक्षक मिल जाही जहां गुरूजी मन के कमी के सेती शिक्षा प्रभावित होवत हे।